Ir-riskji għas-saħħa tal-klima kkawżati mill-għargħar, min-nixfiet u mill-kwalità tal-ilma jitolbu azzjoni urġenti

Ir-rapport tal-EEA “Responding to climate change impacts on human health in Europe: focus on floods, droughts and water quality (Ir-rispons għall-impatti tat-tibdil fil-klima fuq is-saħħa tal-bniedem fl-Ewropa: fokus fuq l-għargħar, in-nixfiet u l-kwalità tal-ilma)” jiġbed l-attenzjoni għall-impatti relatati mal-ilma tat-tibdil fil-klima fuq is-saħħa u l-benesseri li diġà qed jinħassu fl-Ewropa kollha u jinkludi l-imwiet, il-korrimenti, it-tifqigħat ta’ mard infettiv u l-konsegwenzi tas-saħħa mentali. 

Bejn l-1980 u l-2022, ġew irreġistrati 5,582 mewta relatati mal-għargħar u 702 imwiet relatati man-nirien fil-foresti fi 32 pajjiż Ewropew. Illum, wieħed minn kull tmien Ewropej jgħix f’żoni potenzjalment suxxettibbli għall-għargħar tax-xmajjar u madwar 30 % tan-nies fin-Nofsinhar tal-Ewropa jiffaċċjaw stress idriku permanenti. It-tibdil fil-klima se jkompli jżid l-esponiment tan-nies għal estremitajiet tat-temp b’konsegwenzi serji fuq is-saħħa. Iċ-ċittadini anzjani, it-tfal, dawk b’kundizzjonijiet ħżiena tas-saħħa, il-gruppi b’introjtu aktar baxx, il-bdiewa u t-timijiet tas-servizzi ta’ emerġenza huma fost il-gruppi li jesperjenzaw l-akbar impatti fuq is-saħħa minn għargħar, nixfiet, nirien fil-foresti jew mard li jinġarr mill-ilma u minn vetturi. 

B’dawn il-fatti, ir-rapport jissottolinja l-ħtieġa kritika li tiġi implimentata b’mod urġenti l-leġiżlazzjoni eżistenti tal-UE, b’mod partikolari diversi politiki Ewropej dwar il-klima, l-ilma u s-saħħa u li jiġu integrati aktar, kif ukoll jiġu applikati s-soluzzjonijiet diġà eżistenti fis-setturi u fil-livelli kollha tal-gvern biex jiġu protetti l-ħajjiet, jiġu evitati eżiti negattivi tas-saħħa u jiżdied il-benesseri.

Il-protezzjoni tal-ħajja u s-saħħa tal-bniedem mill-impatti tat-tibdil fil-klima, inklużi n-nixfiet, l-għargħar u l-kwalità tal-ilma li marret għall-agħar hija ta’ importanza u urġenza kbira. Il-politiki Ewropej eżistenti dwar il-klima, l-ilma u s-saħħa joffru pedament sod għall-azzjoni, iżda jeħtieġ li jiġu implimentati b’mod aktar wiesa’ u sistematiku. Biex niżguraw il-benesseri futur tagħna, il-livelli kollha tal-gvern f’ħafna setturi jeħtieġ li jistabbilixxu soluzzjonijiet effettivi sabiex inkunu nistgħu nipprevjenu u nnaqqsu l-impatti fuq is-saħħa fiżika u mentali. Aħna nappoġġjawhom b’għarfien permezz tal-attivitajiet tal-EEA u l-Osservatorju Ewropew tal-Klima u s-Saħħa.

Leena Ylä-Mononen

Direttur eżekuttiv tal-EEA

Applikazzjoni aktar mgħaġġla ta’ soluzzjonijiet effettivi

Sabiex intejbu t-tħejjija tagħna għall-isfidi futuri għas-saħħa relatati mal-klima mill-għargħar, mill-iskarsezza tal-ilma u mill-kwalità tal-ilma li qed tiddeterjora, hemm bżonn ta’ risponsi kemm fis-settur tas-saħħa kif ukoll f’setturi oħra li għandhom impatt fuq is-saħħa, inkluż il-ġestjoni tal-ilma, l-ippjanar spazjali, id-disinn tal-bini jew l-assigurazzjoni.

Ir-rapport tal-EEA jfittex li jispira azzjoni billi juri diversi eżempji ta’ soluzzjonijiet prattiċi implimentati fil-pajjiżi membri taż-ŻEE u l-pajjiżi li jikkollaboraw.

Prekundizzjoni għal azzjoni fuq skala akbar hija l-integrazzjoni akbar tat-tibdil fil-klima fil-politiki tas-saħħa fl-Istati Membri u aktar riżorsi u kompetenzi għall-adattament għat-tibdil fil-klima b’fokus fuq is-saħħa fil-livelli sottonazzjonali. Gwadanni rapidi jinkludu s-sensibilizzazzjoni tal-pubbliku dwar ir-riskji u s-soluzzjonijiet, filwaqt li azzjonijiet fit-tul, inkluż titjib fl-infrastruttura u soluzzjonijiet ibbażati fuq in-natura, jeħtieġu ppjanar sistematiku u investiment. Id-differenzi fil-vulnerabbiltà ta’ diversi gruppi tal-popolazzjoni u l-varjazzjoni ġeografika tal-impatti jeħtieġu approċċ ibbażat fuq l-ekwità u mmirat għall-prevenzjoni tal-impatti fuq is-saħħa għal kulħadd taħt il-klima li qed tinbidel.

Riskji ewlenin li jeħtieġu azzjoni

Għargħar

• Bejn l-1980 u l-2022, ġew irreġistrati 5,584 mewta relatata mal-għargħar fit-32 pajjiż membru taż-ŻEE.
• Bħalissa, madwar 53 miljun persuna (12 % tal-popolazzjoni tal-Ewropa) jgħixu f’żoni potenzjalment suxxettibbli għall-għargħar tax-xmajjar, għalkemm spiss b’difiżi kontra l-għargħar fis-seħħ. Dan in-numru żdied b’935,000 bejn l-2011 u l-2021, u wera żvilupp kontinwu fuq il-pjanuri tal-għargħar.
• Wieħed minn kull disa’ sptarijiet fl-Ewropa jinsab f’żoni potenzjalment suxxettibbli għall-għargħar tax-xmajjar.

Nixfiet u skarsezza tal-ilma

• Minħabba d-domanda għall-ilma u n-nixfiet, ir-reġjuni fl-Ewropa jinsabu taħt stress idriku kważi permanenti, u mhux biss fin-Nofsinhar.
• Perjodi twal ta’ temp xott u sħun jiffaċilitaw it-tixrid ta’ nirien fil-foresti, prinċipalment fin-Nofsinhar tal-Ewropa, iżda dejjem aktar f’reġjuni oħra. Bejn l-1980 u l-2022, 702 persuni tilfu ħajjithom direttament minħabba nirien fil-foresti fit-32 pajjiż membru taż-ŻEE, u ħafna aktar kienu affettwati mid-duħħan tan-nirien fil-foresti.

Il-kwalità tal-ilma

• Iż-żieda fit-temperaturi tal-arja u tal-ilma tiffaċilita t-tkabbir tal-patoġeni, u b’hekk jiżdied ir-riskju ta’ mard li jittieħed mill-ilma.
• Avvenimenti qawwija ta’ xita jagħmluha darbtejn aktar probabbli li jkollha konċentrazzjonijiet ta’ patoġeni dannużi fil-korpi tal-ilma minħabba l-iskular ikkontaminat u t-tifwir tad-drenaġġ ikkombinat.
• F’żoni li jinsabu fil-baxx, iż-żieda fil-livell tal-baħar tikkawża intrużjoni ta’ ilma mielaħ fl-ilma ta’ taħt l-art u fl-akwiferi tal-ilma tal-wiċċ, b’effetti konsegwenzjali fuq l-għelejjel.
• Flussi baxxi matul perjodi xotti jirriżultaw f’konċentrazzjonijiet ogħla ta’ inkwinanti, li jeħtieġu trattament tal-ilma mormi li jiswa ħafna flus. Matul perjodi xotti u sħan, il-proliferazzjoni taċ-ċjanobatterji f’ilmijiet rikki fin-nutrijenti tista’ tipperikola l-kwalità tal-ilma.

Dwar ir-rapport

Ir-rapport huwa ppubblikat bħala parti mill-attivitajiet tal-Osservatorju Ewropew għall-Klima u s-Saħħa, li jibni fuq il-ħidma tal-Osservatorju u jikkomplementaha. Ir-rapport isegwi mill-Valutazzjoni Ewropea tar-Riskju Klimatikuppubblikata aktar kmieni din is-sena, li enfasizzat is-saħħa bħala wieħed mis-setturi f’riskju.