News

L-ibħra tal-Ewropa qed jiffaċċjaw ġejjieni inċert jekk ma titteħidx azzjoni urġenti u koerenti

Biddel il-lingwa

Din il-websajt għandha funzjonalità limitata bil-javascript mitfi. Jekk jogħġbok kun ċert li l-javascript huwa attivat fil-brawżer tiegħek.

News Ippubblikat 25 Jun 2020 Mibdul l-aħħar 17 Nov 2021

6 min read

Photo: © Cristian Umili, REDISCOVER Nature/EEA

Topics: Bijodiversità - Ekosistemi L-ilma u l-ambjent tal-baħar Strumenti politiċi

Fid-dawl taż-żieda fit-theddid minħabba l-isfruttament żejjed tar-riżorsi tal-baħar, it-tniġġis u t-tibdil fil-klima, hija meħtieġa azzjoni urġenti biex l-ibħra tal-Ewropa jitreġġgħu lura għal kundizzjoni tajba. Skont ir-rapport tal-Aġenzija Ewropea għall-Ambjent dwar l-ekosistemi tal-baħar tal-Ewropa, li ġie ppubblikat illum, qed jispiċċalna ż-żmien biex inreġġgħu lura għexieren ta’ snin ta’ negliġenza u użu ħażin.

L-ibħra u l-ekosistemi tal-baħar tagħna qed isofru minn snin twal ta’ sfruttament żejjed u negliġenza.

Hans Bruyninckx, id-Direttur Eżekuttiv tal-EEA

Il-kundizzjoni attwali tal-ibħra tal-Ewropa hija ġeneralment fqira skont ir-rapport tal-EEA “Marine Messages II.” (Messaġġi Marittimi II.). Din hija aħbar ħażina għan-nies minħabba li taffettwa l-kwalità ta’ ħajjitna, l-għajxien u l-ekonomiji. Il-kundizzjoni tal-ibħra tagħna tiddetermina l-kapaċità tagħhom li jipprovdu, fost l-oħrajn, l-ossiġenu, l-ikel, klima abitabbli, u ċerta materja prima, u tappoġġa wkoll ir-rikreazzjoni, il-ħin liberu u s-saħħa tagħna.

L-użu storiku u attwali tal-ibħra tagħna — mill-Baltiku sal-Mediterran — qed ikollu effett negattiv, filwaqt li qed iwassal għal bidliet fil-kompożizzjoni tal-ispeċijiet u l-ħabitats tal-baħar u għal bidliet fil-kompożizzjoni ġenerali, kemm fiżika kif ukoll kimika tal-ibħra. Ma’ dawn il-problemi kumplessi hemm miżjud it-tibdil fil-klima, li qed jiggrava l-impatti tat-theddid l-ieħor. L-effetti kkombinati ta’ dawn il-bidliet huma attwalment fir-rotta li tista’ tikkawża ħsara irriversibbli lill-ekosistemi tal-baħar, jgħid ir-rapport tal-EEA. Madankollu, hemm sinjali ta’ rkupru tal-ekosistema tal-baħar f’xi oqsma b’riżultat ta’ sforzi sinifikanti, spiss tul għaxar snin, biex jitnaqqsu ċerti impatti bħal dawk ikkawżati mill-kontaminanti, l-ewtrofikazzjoni u s-sajd eċċessiv, jgħid ir-rapport.

“L-ibħra u l-ekosistemi tal-baħar tagħna qed isofru minn snin twal ta’ sfruttament żejjed u negliġenza. Dalwaqt nistgħu nilħqu punt li minnu m’hemmx ritorn lura, iżda, kif jikkonferma r-rapport tagħna, għad għandna l-opportunità li nreġġgħu lura l-ekosistemi tal-baħar tagħna jekk naġixxu b’mod deċiżiv u koerenti u nsibu bilanċ sostenibbli bejn il-mod kif nużaw l-ibħra u l-impatt tagħna fuq l-ambjent tal-baħar. F’dan il-kuntest, l-Istrateġija l-ġdida tal-UE għall-Bijodiversità għall-2030 u elementi oħra tal-Patt Ekoloġiku Ewropew iwasslu għal tama mġedda li se tittieħed azzjoni urġenti u koerenti għall-protezzjoni u r-restawr,” qal Hans Bruyninckx, id-Direttur Eżekuttiv tal-EEA.

L-Istati Membri tal-UE x’aktarx ma jiksbux fl-ilmijiet kollha tagħhom sal-2020, l-għan ta’ “status ambjentali tajjeb” tad-Direttiva Kwadru tal-UE dwar l-Istrateġija Marina (MSFD), il-liġi ewlenija tal-UE dwar il-protezzjoni tal-ambjent tal-baħar. Minkejja dan, sar progress u kisbiet sinifikanti minn mindu daħlet fis-seħħ id-Direttiva. Dawn il-konklużjonijiet huma mtennija mir-rapport tal-Kummissjoni Ewropea stess, li jirrieżamina l-istat attwali tal-implimentazzjoni ta’ din id-Direttiva, li hija wkoll ippubblikata llum. Ir-rapport tal-EEA jikkontribwixxi għar-rieżami tal-Kummissjoni u jissuġġerixxi soluzzjonijiet li jistgħu jgħinu lill-UE tilħaq l-għan tal-leġiżlazzjoni ta’ ibħra nodfa, b’saħħithom u produttivi, l-aktar permezz ta’ ġestjoni bbażata fuq l-ekosistema.

Id-datakollha rrappurtata mill-Istati Membri tal-UE lill-Kummissjoni ssir pubblika għall-ewwel darba f’sit web apposta fuq WISE-Marine, kif ukoll prodotti tad-data u għodod ta’ viżwalizzazzjoni li jipprovdu ħarsa ġenerali tal-istatus tal-ambjent tal-baħar fl-UE.

Sejbiet ewlenin oħrajn:

L-ekonomija marittima tal-UE qed tkompli tikber u l-kompetizzjoni għar-riżorsi tal-baħar bħall-ħut, il-fjuwils fossili, il-minerali jew il-produzzjoni tal-enerġija rinnovabbli u l-ispazju hija mistennija li tiżdied. Dan se jżid aktar pressjoni fuq l-ekosistemi tal-baħar li diġà huma sfruttati żżejjed. Biex dan jiġi evitat, it-tkabbir f’dan is-settur jeħtieġ li jiġi sseparat mid-degradazzjoni u t-tnaqqis tal-ekosistema tal-baħar u jiġi llimitat fil-limiti għall-użu sostenibbli tagħhom.
Minkejja l-impenji tal-UE u dawk globali, it-telfien tal-bijodiversità fl-ibħra tal-Ewropa ma ġiex imwaqqaf. Numru kbir ta’ speċijiet marittimi u valutazzjonijiet tal-ħabitats ikomplu juru “status ta’ konservazzjoni mhux favorevoli.” Studji jindikaw is-sitwazzjoni diffiċli li jsibu ruħhom fihom speċijiet bħal għasafar tal-baħar, mammiferi tal-baħar (foki u baleni), u stokkijiet tal-ħut, bħall-merluzz.
Miżuri ta’ ġestjoni mmirati lejn speċijiet u ħabitats tal-baħar individwali wasslu għal titjib fil-kundizzjoni tagħhom f’xi reġjuni tal-baħar tal-UE, iżda dan is-suċċess frammentat ma jikkumpensax l-effetti kkombinati ta’ pressjonijiet multipli minn attivitajiet tal-bniedem fl-ibħra kollha tal-Ewropa.
Fejn il-kooperazzjoni reġjonali tkun ġiet stabbilita u implimentata b’mod konsistenti, ix-xejriet negattivi f’ċerti pressjonijiet qed jibdew jitreġġgħu lura, pereżempju, livelli ta’ nutrijenti u kontaminanti jew l-introduzzjoni ta’ speċijiet mhux indiġeni.
L-interazzjonijiet bejn l-art u l-baħar, kif ukoll is-sinifikat taż-żoni kostali, huma dimensjonijiet importanti li għandhom jiġu kkunsidrati meta jitfasslu l-azzjonijiet biex inaqqsu l-pressjonijiet fuq l-ambjent tal-baħar.
Bidliet fit-temperatura tal-oċeani u l-kontenut ta’ ossiġenu, u l-aċidifikazzjoni tal-oċeani, jindikaw li qed isiru bidliet sistemiċi negattivi fir-reġjuni tal-baħar tal-UE, li jkomplu jnaqqsu r-reżiljenza tal-ekosistemi tal-baħar, inkluża r-reżiljenza għat-tibdil fil-klima.L-implimentazzjoni tal-politika tal-UE u l-politika reġjonali tal-passat tgħin biex jiġi identifikat sett ta’ lezzjonijiet għar-restawr tal-ekosistemi tal-baħar, li għandhom jintużaw meta jiġu ppreżentati azzjonijiet u soluzzjonijiet biex jinkisbu ibħra nodfa, b’saħħithom u produttivi.
B’determinazzjoni politika, riżorsi addizzjonali u koordinazzjoni miżjuda fost il-partijiet ikkonċernati u l-integrazzjoni tal-politika, l-Ewropa tista’ timxi lejn “kundizzjoni tajba” għall-ibħra tagħha fil-qafas tal-politika eżistenti tal-UE sal-2030. Biex jintlaħaq dan l-għan, il-pressjonijiet fuq l-ekosistemi tal-baħar għandhom jitnaqqsu. Bl-ambizzjoni tagħha li tipproteġi 30 % tal-ibħra tal-Ewropa u 10 % taħt “protezzjoni stretta”, l-Istrateġija l-ġdida tal-UE għall-Bijodiversità għall-2030 tagħti spinta ġdida biex jitnaqqsu pressjonijiet bħal dawn.
Il-kisba ta’ kundizzjoni tajba għall-ibħra tal-Ewropa hija strumentali għall-objettivi tal-Ekonomija Blu Sostenibbli u l-ippjanar tal-ispazju marittimu kif rifless fil-Patt Ekoloġiku Ewropew.

Informazzjoni ta’ sfond

Ir-rapport tal-EEA “Marine Messages II” (Messaġġi Marittimi II) jibni fuq is-sensiela ta’ valutazzjonijiet tematiċi li ġejjin:

Contaminants in Europe's seas - Moving towards a clean, non-toxic marine environment (Il-kontaminanti fl-ibħra tal-Ewropa - Il-mixja lejn ambjent tal-baħar nadif u mhux tossiku)

Nutrient enrichment and eutrophication in Europe's seas - Moving towards a healthy marine environment (L-arrikkiment tan-nutrijenti u l-ewtrofikazzjoni fl-ibħra tal-Ewropa - Il-mixja lejn ambjent tal-baħar b’saħħtu)

Biodiversity in Europe's seas (Il-bijodiversità fl-ibħra tal-Ewropa)

Multiple pressures and their combined effects in Europe's seas (Pressjonijiet multipli u l-effetti kkombinati tagħhom fl-ibħra tal-Ewropa)

Permalinks

Permalink to this version: 5a8a8281ca654be4b2c3a1141ccdf8c7
Permalink to latest version: Z0F9M2VUXJ

Geographic coverage

Albania Austria Belgium Bosnia and Herzegovina Bulgaria Croatia Cyprus Czechia Denmark Estonia Finland France Germany Greece Hungary Iceland Ireland Italy Kosovo Latvia Liechtenstein Lithuania Luxembourg Malta Montenegro Netherlands North Macedonia Norway Poland Portugal Romania Serbia Slovakia Slovenia Spain Sweden Switzerland Turkey United Kingdom