Il-livelli tat-tniġġis tal-arja fl-Ewropa kollha għadhom mhumiex fuq livell sikur, speċjalment għat-tfal

Filwaqt li l-emissjonijiet ta’ sustanzi niġġiesa tal-arja ewlenin naqsu matul dawn l-aħħar deċennji, il-livelli tat-tniġġis tal-arja fl-Ewropa għadhom mhumiex fuq livell sikur. It-tfal u l-adolexxenti huma partikolarment vulnerabbli għat-tniġġis tal-arja minħabba li l-ġisem, l-organi u s-sistema immunitarja tagħhom ikunu għadhom qed jiżviluppaw. Skont il-briefing tal-EEA “Air pollution and children’s health” (It-tniġġis tal-arja u s-saħħa tat-tfal), it-tniġġis tal-arja jagħmel ħsara lis-saħħa matul it-tfulija u jżid ir-riskju ta’ mard fi stadju aktar tard fil-ħajja.

Aġġornament ta’ monitoraġġ tal-EEA tal-2022: il-livelli ta’ tniġġis tal-arja jibqgħu persistentement għoljin

Fl-2021, ’il fuq minn 90% tal-popolazzjoni urbana tal-UE ġew esposti għal livelli ta’ ħsara tad-diossidu tan-nitroġenu, tal-ożonu u ta’ materja partikolata fina (PM_2.5).

Il-PM_2.5 hija waħda mis-sustanzi niġġiesa li l-aktar jagħmlu ħsara lis-saħħa tal-bniedem, b’esponiment għall-PM_2.5 li hija kawża ewlenija ta’ puplesija, kanċer u marda respiratorja. Fl-2021, 97% tal-popolazzjoni urbana kienu esposti għal konċentrazzjonijiet ta’ PM_2.5 ogħla mil-linja gwida annwali tad-WHO tal-2021 ta’ 5 µg (mikrogrammi) /m³.

Skont datapreliminari mill-2022, l-Ewropa tal-Lvant Ċentrali u l-Italja rrappurtaw l-ogħla konċentrazzjonijiet kemm tal-PM_2.5 minħabba primarjament il-ħruq ta’ fjuwils solidi bħall-faħam għat-tisħin domestiku kif ukoll l-użu tagħhom fl-industrija.

Il-briefingtal-EEA “Europe’s Air Quality status 2023” (L-istatus tal-Kwalità tal-Arja fl-Ewropa 2023) jippreżenta l-istatus tal-konċentrazzjonijiet tas-sustanzi niġġiesa tal-arja fl-2021 u fl-2022 għal sustanzi niġġiesa regolati, fir-rigward kemm tal-istandards tal-kwalità tal-arja tal-UE kif ukoll tal-livelli tal-linji gwida tad-WHO tal-2021.

Kemm hi nadifa l-belt tiegħek? Il-bliet Portugiżi u Żvediżi jiksbu l-ogħla punteġġ f’dak li jirrigwarda arja nadifa

Skont il-viżwal aġġornat tad-datatal-EEA dwar il-kwalità tal-arja tal-bliet, Faro fil-Portugall, u l-bliet Żvediżi ta’ Umeå u Uppsala ġew ikklassifikati bħala l-bliet Ewropej l-aktar nodfa u kellhom il-livelli medji l-aktar baxxi ta’ materja partikolata fina, jew PM_2.5, matul l-aħħar sentejn kalendarji. Il-bliet jiġu kklassifikati mill-belt l-aktar nadifa għal dik l-aktar imniġġsa, abbażi ta’ livelli medji fuq terminu twil ta’ materja partikolata fina.

Sfond

Skont il-Pjan ta’ Azzjoni ta’ Tniġġis Żero tal-Patt Ekoloġiku Ewropew, il-Kummissjoni Ewropea stabbiliet il-mira tal-2030 li jitnaqqsu l-għadd ta’ mwiet prematuri kkawżati mill-PM_2.5 (sustanza niġġiesa tal-arja ewlenija) b’mill-inqas 55% meta mqabbla mal-livelli tal-2005. Fir-rigward ta’ dan, fl-2022 il-Kummissjoni Ewropea ppubblikat proposta biex jiġu rrieżaminati d-direttivi dwar il-kwalità tal-arja ambjentali, li għandhom l-għan, fost affarijiet oħra, li jallinjaw l-istandards tal-kwalità tal-arja aktar mill-qrib mar-rakkomandazzjonijiet tad-WHO.

Il-valutazzjonijiet tal-kwalità tal-arja tal-EEA jenfasizzaw is-sustanzi niġġiesa meqjusa li huma l-aktar ta’ ħsara għas-saħħa tal-bniedem jew li b’mod l-aktar frekwenti jaqbżu l-istandards tal-kwalità tal-arja tal-UE u l-livelli ta’ linji gwida tad-WHO. Il-konċentrazzjonijiet jinkisbu minn kejl imwettaq f’aktar minn 4,500 stazzjon ta’ monitoraġġ fl-Ewropa kollha, li jiġi rrappurtat b’mod uffiċjali lill-EEA mill-pajjiżi membri tagħha u minn pajjiżi oħra kollaborattivi.